СЗО одлучи да започне преговори за договор за превенција и контрола на пандемијата

Тедрос Аданом Гебрејесус / Фото: EPA-EFE/MARTIAL TREZZINI

Светската здравствена организација (СЗО) денеска соопшти дека ќе почне преговори за меѓународен договор за превенција и контрола на идните пандемии додека светот се подготвува да се бори против новиот сој на коронавирусот – Омикрон.

Договорот за засилување на мерките за пандемијата се очекува да биде готов во мај 2024 година, покривајќи прашања кои се движат од споделување податоци и секвенционирање на новите геноми на вируси до правична дистрибуција на вакцини и лекови добиени од истражување.

„Донесувањето на таа одлука е причина за славење и причина за надежта што ни е потребна на сите”,рече шефот на СЗО Тедрос Аданом Гебрејесус на состанокот на министрите за здравство. 

Според него, претстои уште долг пат.

„Се уште има различни мислења за тоа што може или треба да содржи новиот договор”, рече Тедрос, повикувајќи на продолжување на соработката.

Тој додаде дека во меѓувреме, земјите треба да ги почитуваат меѓународните здравствени регулативи на СЗО од 2005 година.

Одлуката, насловена „Свет заедно”, беше усвоена со консензус на специјалното собрание на 194 држави кои се членки на здравственото тело на ОН, што предизвика аплауз на крајот од тридневниот состанок.

„Текстот пред нас е резултат на опсежни дискусии, искрени размени и компромиси”, рече австралиската амбасадорка Сали Менсфилд, која беше копретседавач со работната група.

Европската унија се залага за меѓународно правно обврзувачки договор, заедно со околу 70 земји, но Бразил, Индија и САД беа меѓу оние кои не сакаа да се посветат на договорот, велат дипломатите.

„Повикуваме на амбициозен процес во развојот на овој договор – сите ние да ја покажеме нашата мултилатерална посветеност и посветеност на обврзувачкиот инструмент”, рече амбасадорката Лоте Кнудсен, шеф на делегацијата на ЕУ во ОН во Женева.

САД ја поздравија одлуката во соопштението, велејќи: „Овој важен чекор ја претставува нашата заедничка одговорност да работиме заедно за да ја подобриме здравствената безбедност и да го направиме глобалниот здравствен систем посилен и почувствителен”.

Извор: МИА

Видео на денот