СЗО: Епидемиолошката ситуација во Европа е многу загрижувачка
Регионалната канцеларија на Светската здравствена организација (СЗО) за Европа денеска оцени дека ситуацијата на континентот во однос на пандемијата на коронавирус е причина за „голема загриженост”.
Поради зголемениот број на дневни случаи на ковид-19 пријавени низ цела Европа, државите, вклучувајќи ги Германија, Велика Британија, Холандија и Шпанија започнаа да воведуваат дополнителни мерки за да го забават вториот бран на пандемијата и да се обидат да го намалат нејзиното влијание.
– Дваесет и седум земји-членки на Европската унија и Велика Британија во просек евидентираат по 78 000 случаи дневно, во периодот од 5 до 12 октомври или 152 случаја за милион жители. САД бележат 49.000 дневно во просек за истиот период или околу 150 на милион жители, објави денеска „Волстрит журнал“.
Тоа е првпат Европа да ги надмине САД од врвот на вирусот во пролетта, кога болеста се ширеше во голема мера неоткриена поради ограничениот капацитет за тестирање на земјите. Европа сега достигна критична маса на нови случаи слични на оние со кои САД се соочија кон крајот на јуни кога бројот на заразени вртоглаво се зголеми од Флорида до Калифорнија, посочува весникот.