СЗО: Делта сојот и недостапноста до вакцини може да им донесат катастрофални последици на земјите од Блиски Исток
Зголемувањето на бројот на новозаразени луѓе со Ковид-19 во неколку земји од Блиски Исток може да има големи последици, поради ширењето на делта сојот и малата достапност на вакцини, соопшти Светска здравствена организација (СЗО).
По намалувањети на бројот на заразени и смртни случаи во период од осум недели, СЗО тврди дека има знаци на ново зголемување во Либија, Иран, Ирак и Тунис, додека брз раст се очекува во Либан и Мароко.
Следната недела, земјите од блискоисточниот регион ќе го одбележат Бајрам, кој традиционално се одбележува со собири, на кои може да се прошири инфекцијата.
– СЗО е загрижена дека ширењето на Ковид-19 може да продолжи и во наредните недели со катастрофални последици, соопшти регионалната канцеларија на организацијата.
СЗО како причини за новото ширење на коронавирусот ги наведува непочитувањето на здравствените и социјалните мерки како и ниската стапка на вакцинација и ширењето на новите соеви.
Според СЗО, Тунис е земја со најголема смртност од последици од Ковид-19 во регионот и во Африка и истакна дека за четири недели бројот на дневни случаи во Иран е двојно зголемен.
Бројот на заразени со Ковид-19 во регионот на Источен Медитеран, кој ги вклучува Пакистан, Авганистан, Сомалија и Џибути, како и земјите од Блиски Исток, надмина 11,4 милиони, а пријавени се 223.000 смртни случаи.