Од 20 октомври лани до денес се поднесени кривични пријава за пет превозници за непочитување на мерките за спречување на ширење на заразна болест и овозможувале над 50 отсто исполнетост на капацитетот на возилата со патници, информираат од СВР Тетово. Владата, пак, вчера донесе одлука за зголемување на исполнетоста на капацитетот на превозните средства од 50 на 75 проценти.

– Сите пет случаи се заокружени со исто толку поднесоци, односно пријави за „непостапување според здравствени прописи за време на епидемија” согласно член 206 од Кривичниот законик. Покрај ова, значителен број на превозници се и писмено опоменати. СВР Тетово и во наредниот период ќе го следи и санкционира имплементирањето на владините одлуки, мерки и протоколи на овој план, информира Марјан Јосифоски, портпарол на тетовската полиција.

Минатиот и овој месец, на подрачјето на СВР Тетово се санкционирани и речиси 1.400 поединци за неносење на заштитна маска во возилата, меѓу кои и значителен број во јавниот превоз.