СВР Охрид: Пријави за два нападa од кучиња скитници врз граѓани во Кичевско
Два напада на кучиња скитници врз граѓани се регистрирани во текот на вчерашниот ден во Кичевско, информира портпаролот на СВР Охрид, Стефан Димоски.
– Во текот на вчерашниот ден на територија на Општина Кичево се регистрирани два напада врз луѓе од кучиња скитници. Првиот напад се случил во село Лисичани каде настрадал А.С. (49), кој бил нападнат во близина на селскиот стадион. Вториот напад се случил во кругот на РЕК „Осломеј” каде бил нападнат Ј.Ч. (43) од село Црвивци, рече портпаролот Димоски.
Од Кичево или околните села, речиси, секојднево стигнуваат информации за регистрирани напади од кучиња скитници врз недолжни граѓани, при што често се случува жртвите да се здобијат и со потешки повреди.
Повеќето напади завршуваат само со информација, но сè почесто овие напади имаат и судска разрешница, а граѓаните добиваат материјален надомест за претрпената штета која може да изнесува и повеќе стотини евра.