Светскиот првак пред елиминација, Данска убедлива против Црна Гора
Во последниот натпревар од денешниот ден на женското Европско првенство, домаќинот Данска оствари убедлив триумф над Црна Гора.
Данските ракометарки славеа со убедливи 28:19 и веќе си го обезбедија пласманот во наредната рунда.
По израмнетото прво полувреме кое заврши со предност од два гола за организаторот на ЕП (13:11), во второто полувреме избраничките на селекторот Јенсен потврдија зашто се сметаат за еден од главните фаворити за титулата. Со серија од 9:0 поведоа со 24:13 и ги решија дилемите околи победникот.
Бидструп, Остегард Јенсен и Педерсен беа најпрецизни кај Данска со по четир постигнати гола, додека кај Црна Гора најпрецизни беа поранешната вардарка, Јованка Радичевиќ и Рамусовиќ исто така со по четири постигнати гола.
Изненадувањето на вториот ден од ЕП го направи Хрватска која му го нанесе вториот пораз на светскиот шампион Холандија. Откако во првото коло загуби од Србија, светскиот шампион денеска со 27:25 е поразен и од Хрватска.
Доколку сака да се пласира во следната фаза, Холандија во последното коло мора да ја совлада Унгарија, а Србија да загуби од Хрватска по што ќе се создаде група од три селекции (Унгарија, Холандија, Србија) и каде ќе одлучува гол разликата.
Резултати:
Србија – Унгарија 25:38
Хрватска – Холандија 27:25
Словенија – Франција 17:27
Данска – Црна Гора 28:19