Се шпекулира името на Еивинд Танген како ново можно засилување за македонскиот ракометен шампион Вардар.

Норвежанецот игра на позицијата десен бек, 27-годишниот играч со својата репрезентација успеа годинава да го освои бронзениот медал на Европското првенство одржано во Шведска, Австрија и Норвешка.

Воедно со националната селекција во 2017 година дојде до сребро на Мундијалот во Франција, а истото го направи и две години подоцна во Германија и Данска.

Танген на клупски план досега ги бранеше боите на Скјерн, а претходно беше дел уште од Филинген Берген и Митјиланд.

Освен норвешкиот репрезентативец, со „црвено-црниот“ дрес се поврзуваат уште Никола Митревски, Владислав Остроушко, Филип Талески, Артсјом Кулак, Филип Чурлевски, Јуре Доленец, Гоце Георгиевски и Ненад Костески, барем како што вели „магичната“ Википедија.

На располагање треба да биде десниот бек Томислав Јагуриновски од Металург, а тренерот Стевче Алушовски го очекува и Русинот Дмитри Санталов.

Наскоро новиот старо-новиот сопственик Михајло Михајловски треба да ја запознае јавноста со следните планови на Вардар, а досега доста сериозни на трансфер пазарот се покажуваат Металург и Еурофарм Пелистер.