Србија ќе добие заем од 65 милиони долари од Светска банка за одржување на нејзината железничка инфраструктура, соопшти Банката. „Овој заем ја претставува втората транша од повеќефазниот програмски пристап (MPA) за Проектот за модернизација на железничкиот сектор во Србија, преку кој ѝ се помага на оваа земја да изгради побезбеден, поефикасен и попријатен за климата железнички сектор.

Србија во претходниот период инвестираше значителни средства во проширувањето на својата железничка мрежа: според проценките досега се инвестирани повеќе од 2,3 милијарди долари, а продолжување на инвестициите се очекува во следните пет до шест години, стои во соопштението на Светска банка, објави порталот Данас.

Редовното одржување е од клучно значење за да се зачуваат резултатите од обемните јавни инвестиции, но и да се обезбеди квалитетот и безбедноста на овие клучни услуги за јавен транспорт.

„Целта на оваа фаза од проектот е да се зголеми капацитетот за подобро одржување на постојната железничка инфраструктура, да се модернизираат капацитетите за одржување на железницата и да се подобри управувањето и планирањето на средствата“, изјави Никола Понтара, директор на Канцеларијата на Светска банка во Србија.

– Во оваа фаза од програмата се отвора можноста за поголемо учество на приватниот сектор во изградбата на интермодални објекти и приклучоци на ниво на „последниот километар“ од мрежата – додаде Понтара.