Светиниколска „Мода“ прави струја и кога не работи
Текстилната компанија „Мода“ од Свети Николе веќе обезбедува две третини од сопствените потреби за струја од соларни панели, а вишокот на струја го продава, вели за „Слободен печат“ Ангел Димитров, претседател на Одборот на директори на компанијата.
На покривот на фабриката лани во декември во партнерство со ОКТА АД – Скопје, беа поставени 1.060 фотонапонски панели. Според договорот, „Мода“ добива гарантирана цена на струјата, а ОКТА ја надоместува разликата во цената со продажба на вишокот на слободниот пазар. Фотоволтаичната централа со вкупна инсталирана моќност од 296,40 киловат-часови, произведува „зелена“ електрична енергија. Димитров вели дека трошоците за електрична енергија им се намалиле, не загадуваат, а инвестицијата ќе им се исплати за неколку години.
– Струјата учествува со голем процент во нашите вкупни производствени трошоци. Токму затоа се вклучивме во овој проект што ни носи бенефит, а во исто време придонесува за заштита на животната средина. Вишок струја се појавува кога не се работи и ако немаш дозвола за продажба, таа струја пропаѓа, оди во мрежата – објаснува Димитров.
Димитров е на ставот дека државата можеби избрзала со откажувањето од другите енергетски објекти, бидејќи обновливите извори сепак зависат од временските услови.
– Ветерот и сонцето се чисти извори на енергија, ама се нестабилни. Има денови кога нашите панели произведуваат дневно и по 1.800 киловати струја, ама ете вчера беа произведени само 300 киловати. Значи, мора да имаме сигурно производство и обезбедена енергија – заклучува Димитров.