Ракометната репрезентација на Македонија вечерва со натпреварот против Данска го завршува настапот на Европското првенство.

Настапот на ЕП во Унгарија и Словачка требаше да биде последно во неверојатната кариера на Кирил Лазаров, но повредата на еден од последните тренинзи пред стартот на ЕП го остави најдобриот македонски ракометар на сите времиња без настап во Дебрецин.

Десното крило на данската репрезентација, Ласе Сван (38), на кого ова му е последно ЕП, за ТВ2 вели поинакви ќе беа игрите и резултатот на Македонија доколку на теренот беше Лазаров.

-Искрено ми е жал за Кире Лазаров. Тој имаше толку долга и блескава кариера, заслужи да ја заврши на вистински начин, на терен а не вака… И покрај неговата возраст, сигурен сум дека ќе го кренеше нивото на игра на македонската репрезентација. Лазаров е искусен ракометен џентлмен кој знае се за овој спорт и сигурно ќе им помогнеше на Македонците. Неговото неиграње е голема штета, како за самиот играч, така и за целокупната репрезентација – изјави Сван за данската телевизија.