Норвешкиот суверен фонд, вреден 1,15 трилиони долари, треба повеќе да се пренасочи кон инвестиции во САД и во Канада, отколку во Европа, предложи денеска малцинската Влада во Осло.

Таквиот предлог што бил доставен до Парламентот по препорака на норвешката централна банка која управува со фондот, на крајот може да резултира со трансфер на повеќе од 100 милијарди долари во американски акции.

– Измените што ги предлагаме ќе обезбедат подобра распределба на инвестициите во создавање додадена вредност во компаниите кои котираат на глобално ниво, нагласи министерот за финансии Јан Торе Санер.

Најголемиот светски суверен фонд традиционално им даваше приоритет на европските берзи, со фокус на земјите со кои Норвешка најмногу тргува, а помалку на земјите во Северна Америка.

Фондот во моментот поседува околу 1,5 процент од сите акции на глобално ниво, при што неговиот сопственички удел во компании во Европа изнесува 2,6 проценти од сите акции,и нешто повеќе од 1,0 проценти во САД, се наведува во информацијата.