Еден од најсуровите педофили во историјата на Британија е пронајден мртов во неговата затворска келија. На неговото тело биле пронајдени убодни рани од нож, објави британски „Индепендент“.

Ричард Хакл служеше 22 последователни доживотни затворски казни, откако призна дузина сексуални престапи против деца во Малезија.

Министерството за правда на Велика Британија ја потврди информацијата за неговата смрт, но не понуди дополнителни детали. Скајњуз пак, пренесе дека убиството се случило во „соминителни услови“.

Хакл, кој бил фриленс-фотограф, ги наоѓал своите жртви во сиромашните краеви на малезискиот главен град Куала Лумпур.

Преправајќи се дека е учител по англиски и голем христијанин, тој злоупотребувал деца на возраст меѓу шест месеци и 12 години, и тоа го правел во период од девет години меѓу 2006 и 2014 година.

Тој исто така се обидувал да заработи пари преку објавување на видеа како злоупотребува 13-годишно девојче.

Покрај сите криминални дела, Британецот има објавено „прирачник“ со вознемирувачки наслов: „Педофилите и сиромаштијата: Водич за љубовници на деца“.

Повеќе од 20,000 непристојни фотографии и видео-снимки се пронајдени на неговиот компјутер кога е уапсен на аеродромот Гетвик во 2014 година. Педофилот тогаш се обидувал да се врати во Велика Британија за да ги помине Божиќните празници со неговото семејство.

Детективите успеале да идентификуваат 23 жртви, главно од сиромашни христијански семејства, но се верува дека тој злоупотребил речиси 200 деца.