Вардар 1961 го запиша и седмиот триумф по ред во домашната Суперлига откако во малата сала на СЦ „Јане Сандански“ – Скопје со конечен резултат 36:27 славеше над Струга.

Бранителот на титулата единствено на стартот налета на силен отпор од стружани кои беа на негатива од само „минус два“ (5:3), но потоа скопските „црвено-црни“ со серија од 5:0 го најавија победникот (10:3).

Оваа висока разлика се одржуваше до крајот на првото полувреме, а на паузата домаќините заминаа со уште поголемо водство од 20:11.

Ништо не се промени во вториот дел, играчите на тренерот Владо Недановски го контролираа мечот и на крајот запишаа нови суперлигашки бодови.

Во победничките редови доминираше Савревски со седум голови, Лазаревски имаше еден погодок помалку, а на спротивната страна по шест голови имаа Бугариновиќ и Цветаноски.

На табелата во групата „Б“ води Вардар 1961 со максимални 21 бод, додека ракометарите на Струга после третиот пораз во низа се на петтото место со седум бодови.