Нема итни планови за распоредување воени инструктори во Украина, изјави британскиот премиер Риши Сунак, отстапувајќи од коментарите на неговиот министер за одбрана, кој сугерираше дека војниците би можеле да вршат обука во земјата, пренесува Ројтерс.

До денес, Британија и нејзините сојузници избегнуваат формално воено присуство во Украина за да го намалат ризикот од директен конфликт со Русија.

Британскиот министер за одбрана Грант Шапс, кој беше назначен на оваа функција минатиот месец, изјави во интервју за весникот Телеграф дека сака да распореди воени инструктори во Украина, покрај обуката на украинските вооружени сили во Велика Британија или други западни земји.

Неколку часа по објавувањето на интервјуто, Сунак рече дека нема итни планови за испраќање британски војници во Украина.

„Она што го кажа министерот за одбрана е дека можеби ќе биде можно еден ден во иднина да направиме дел од таа обука во Украина. Но, тоа е нешто долгорочно, а не овде и сега. Нема британски војници кои ќе бидат испратени да се борат во сегашниот конфликт“, им рече Сунак на новинарите.

Поранешниот руски претседател Дмитриј Медведев синоќа рече дека сите британски војници кои тренираат украински војници во Украина ќе бидат легитимни цели за руските сили.

Велика Британија обезбеди петнеделни курсеви за воена обука на околу 20.000 Украинци во текот на изминатата година и има намера да обучува сличен број во иднина.

Во интервју за Сандеј Телеграф, Шапс рече дека има простор да се понуди воена обука во Украина по дискусијата во петокот со британските воени началници.

„Денес зборував за евентуално приближување на обуката и всушност и во Украина“, рече тој. „Особено во западниот дел на земјата, мислам дека сега има можност да се донесат повеќе работи „во земјата“.

Шапс додаде дека се надева оти британските одбранбени компании како БАЕ Системс ќе продолжат со плановите за формирање фабрики за оружје во Украина.

Во својот говор на конференцијата, Шапс не се осврна на неговите претходни коментари, но рече дека војната во Украина троши оружје и луѓе „со ужасна брзина“, но „ние мора да останеме цврсти“ во поддршката на земјата во нејзината војна против Русија.

Шапс, исто така, рече дека стотици британски мировни трупи ќе бидат испратени на Косово во наредните денови по најголемото насилство во северниот дел на земјата во последните неколку години.

Британски борбени авиони, исто така, беа испратени во Полска овој викенд, рече Шапс, за да помогнат во заштитата на источното крило на НАТО по барањето на полската влада пред националните избори во земјата овој месец.