Судијата Туфегџиќ бара ОЈО да отвори предмет по исказот на Слободан Богоевски
Судијата Владимир Туфегџиќ кој е во судечкиот совет во предметот познат како „Таргет-Тврдина“, на денешното рочиште, по сведочењето на поранешниот шеф на тајната полиција Слободан Богоевски, од обвинителите во овој случај Ленче Ристовска и Трајче Пеливанов побара тие најитно што може да го известат нивниот претпоставен-Републичкиот јавен обвинител за изказот и тврдењата кои во судница ги искажа поранешниот разузнавач. Токму Богоевски денеска изјави:
„И денес ги трпам последиците донесени од судот по наредба на Мијалков. За сите средби на Мијалков со сите обвинители и судии кои учествувале во мојот предмет имам докази. Имам писмени искази заверени на Нотар кои присуствувале на тие средби. Многу пресуди се правосилни како и мојата, но се базирани од нелегално прислушкувани разговори“.
Судијата Туфегџиќ истакна дека начинот на кој тоа денеска било искажано во судница го смета за допрен глас и нагласи дека застапниците на обвинението по приемот на записникот од денешното рочиште имаат обврска да го известат Јавниот обвинител.
– Јас како истражен судија сум учесник во постапката која беше водена против сведокот. Ќе барам од ОЈО информација дали е поведена постапка бидејќи и во јавни настапи и во дебатни емисии сведокот го има тврдено истото. Јас од СЈО побарав да добијам информација дали сум бил незаконски прислушкуван. Добив негативен одговор. Ова денес го сфатив лично и немам што да кријам – рече судијата Туфегџиќ.