Стравотна тишина и бројни полициски контроли на скопските улици (ВИДЕО)
Стравотна тишина владее вечерва по скопските улици и булевари. Откако во 16 часот денеска започна полицискиот час кој ќе трае до 5 часот изутрина, вечерва единствени по улиците кој минуваа се лицата кој одат или се враќаат од своите работни места, а сите нив ги контролираат бројните полициски патроли.
Токму полициското присуство во градов вечерва е со ист број и капацитет како и изминатите вечери откако на сила е полицискиот час. На сите клучни раскрсници има постојани полициски патроли, ги легитимираат сите кои се движат по улица, а истото се однесува и на возачите.
Полицајците со заштитни маски на лицето и медицински ракавици на рацете ги проверуваат дозволите и личните карти на минувачите. Откако ќе минете една проверка, на само изминати неколку стотина метри, без разлика по која улица или булевар се движите ќе наидете на нова патрола. И повторно проверка на документите.
Вечерва, иако станува збор за сабота, имаше и такви кој облечени во темна облека, скришум со трчање ги претрчуваа улиците, само да стигнат таму каде наумиле, а да ги избегнат патролите и големите прекршочни и парични казни.
Од нашата вечерна обиколка на градот, но и од разговор со припадниците на полицијата дознаваме дека беспрекорно се почитува полицискиот час во Скопје, а до сега не е регистриран ниту едно нарушување на полицискиот час.