Стоматолог Илија Караманов: Терапија на гингивите

Третирањето на гингивитот, а во склоп на тоа и третирањето на пародонтопатијата, е процес кој воопшто не е едноставен и околу кој се вртат многу непознаници. Честопати, самите пациенти прават елементарни грешки со кои само ја влошуваат својата состојба. Една од најчестите грешки е престанувањето на четкање на забите или одбегнување на некоја регија заради појавата на крвавење. Со тоа всушност, се влошува хигиената, односно самиот причинител за појава на крвавењето.

Слично е и со избегнувањето на чистење на забниот камен „за да не се расклатат забите“, а токму присуството на забен камен е главниот причинител за губењето на потпорниот апарат на забите и нивно расклатување. Користењето на специјални пасти за заби, кои најчесто се и доста поскапи, а без притоа да се санира состојбата од страна на стоматолог, исто така најчесто поминува без да даде никаков резултат. Во тој контекст е и користењето на различни фармацевтски препарати, па дури и антибиотици.

Терапија

Многу важно е да се нагласи дека секој случај на гингивит и пародонтопатија е, пред сѐ, индивидуален. Најпрво што треба да се направи е да се посети стоматологот, кој после добро земената анамнеза и преглед, ќе ја постави правилната дијагноза и ќе ја предложи и спроведе правилната терапија. Најчесто се пристапува кон отстранување на причинителот, односно чистење на забниот камен (тврдите забни наслаги), чистење со забен конец и полирање на забите, со што се отстрануваат и меките забни наслаги. Се даваат инструкции на пациентот со цел да ги отстрани недостатоците во одржувањето на својата орална хигиена. Пожелно е по извесен период да се направи контрола на состојбата на гингивите, но и да се исконтролира оралната хигиена. Со други зборови, на лекарот му е потребно малку време за добро да ја запознае проблематиката кај пациентот за да може правилно да ја насочува терапијата. Кај изразени и поупорни крвавења се ординира и витамин Ц, кој има за задача да ги зајакне ѕидовите на малите крвни садови т. е. капиларите. По потреба се препорачува и соодветна паста за заби, тоалетни водички, поредовно користење на забен конец и интердентални четкички, а во дадени случаи се ординира и антибиотска терапија.

Воспаление на гингивите во бременоста

Овде треба да се напомене и гравидарниот гингивит (воспаление на гингивите како резултат на бременост), кој е речиси секогаш присутен, но не треба да ја загрижува многу бремената жена, затоа што е резултат на хормонските и ензимските промени во време на бременоста. Секако и овде посетата на стоматологот е правилниот чекор во санирањето на таа промена.

Видео на денот