Стојоски: Резултат кој ми дава голем мотив, заслужено сум шести во Европа! – Слободен печат
РакометСпорт

Стојоски: Резултат кој ми дава голем мотив, заслужено сум шести во Европа!

Да потсетиме, за прв пат во историјата на македонската атлетика имавме финалист на Европско првенство под 23 години во Гавле, Шведска.

Нашиот атлетичар Јован Стојоски кој воедно е и член на АК Охрид, најпрвин со резултат 47.02 секунди во полуфиналната рунда го освои третото место и се пласираше во финалето, во борбата за медалите.

На финалната трка на 400 метри Стојоски го освои шестото место на евро шампионатот во Гавле, Шведска и за една стотинка го подобри резултатот.

Атлетската федерација на Македонија му упатија честитки и му посакуваат успех и во претстојните натпревари за нашата репрезентација.

Принтскрин/facebook

– Сега кога сè се заврши, можам да кажам дека се чувствувам одлично! Конкуренцијата беше како и секогаш на вакви натпреварувања многу силна. Но, мислам дека имав три добри трки и заслужено сум на шестото место на овој континент. Многу бев блиску до својот личен рекорд кој е 46.92 секунди, мислам дека сум подготвен тоа да го поправам уште малку оваа година – ни изјави Стојоски.

Дефинитивно ретко гледаме македонски атлетичар на вакви големи натпреварувања да се бори за еден од медалите, па го прашавме кои се неговите наредни активности.

– Ме очекуваат големи натпреварувања, до крајот на годината секако е најважно Светското првенство во Доха. Тука се секако и Балканското првенство како и Европскиот куп каде што ќе се обидам да донесам што повеќе бодови на Македонија. Секако дека сум мотивиран уште повеќе и полн со самодоверба. Мислам дека мојот тренер Марина Мишиќ и јас работиме многу добро – додаде Стојоски.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close