Стил на неделата: Рисима Рисимкин, кореографка
Ана Арсеновска – Зафирова, новинарка, за „Женски печат“ одбра стил на неделата, а според неа, тоа е кореографката Рисима Рисимкин.
– Постојаноста е карактеристика која денес не ја сретнувам често и затоа ме радуваат сите оние што ја поседуваат и се придржуваат до неа. Кореографката Рисима Рисимкин веќе 30 години во низа нè држи во тек со современата танцова сцена. Нејзиниот израз го препознаа и во светот, па покрај кореографските поставки на фестивалите и театрите по Кина, Холандија, Германија, Америка, Турција, Словенија, и култниот театар за современ танц „Шајо“ во Париз ја чека 2021 година на својот репертоар. И не само доследноста, врвниот квалитет и искреноста се црти кои ги препознавате видливо кај неа. Тоа што мене особено ме допира е несебичното вложување во иднината. За неа, иднината се нејзините студенти, кај кои не само што им ги развива танцовите потенцијали, туку им помага и полесно да ги совладаат животните предизвици кои секој танчер ги има, а таа искуствено тоа знае да го препознае. Љубопитноста и страста ја носат до современиот танц и тие денес сè уште неуморно ја движат, вели Арсеновска – Зафирова.