Стихозбирката „Форми во создавање“ од Љубица Шопова, објавена од „ПНВ Публикации“ минатата година, својата промоција ја имаше на 5 август оваа година во кафе-книжарницата „Буква“. Модератор на промоцијата беше Јулијана Величковска, а книгата ја промовираше поетесата Ана Голејшка Џикова.

– Она што плени во дебитантската стихозбирка на Љубица е тоа што сѐ што е напишано е тука за да се создаде, за да излезе, да се испили од големиот облак што наутро ѝ цеди кафе, на средбата со себеси. Низ песните, Љубица ја раскажува прогнозата за животот, преку силните (раз)врски со семејното јадро, мајчинската топлина, ритуалите со таткото, врската со она што е внатре, во домот, но и предизвикот свртен кон надвор, кога времето истекува низ годините. Притоа, темите се како месо, крв и роботика – песните функционираат на ниво со современото употребување социјални медиуми, компјутери, алатки што го поврзуваат човекот со иднината, со она што е форма на ново создавање, нова креација – забележува Ана Голејшка Џикова.

Песните објавени во стихозбирката се пишувани во текот на четири години, а авторката Шопова, која работи како економист што својата страст за пишување ја изразува со поетски стихови како начин на себеоткривање во светот што ја опкружува, истакнува дека „пишувањето е копнеж по слободата“.

Професорот Владимир Мартиновски додава дека „поетскиот првенец на Љубица Шопова претставува концептуално доследно осмислено, поетички зрело и мајсторски заокружено остварување. Во секоја песна на Шопова се излегува од ’зоната на комфорот‘ на готови и испробани поетски формули“.

(Текстот е објавен во „Културен печат“ број 92, во печатеното издание на „Слободен печат“ на 7-8 август 2021)