Книгоиздателството „Дијалог“ од Скопје ја издаде новата поетска книга „Од оваа страна“ на Весна Ацевска. Книгата е објавена во едицијата „Современа македонска поезија“, со поддршка на Министерството за култура.

На насловната корица е употребена фотографија со делото „Пред огледало“ на младата сликарка и графичарка Љупка Галазка-Василев, а дизајнот на корицата е на Живко Атанасовски. Покрај четириесетина песни, во книгата е објавен и есејот „На страната на поезијата“, каде авторката ја разоткрива својата поетска насока.

Весна Ацевска (Скопје, 1952) е поетеса, авторка на романи за деца и младина и преведувачка. Член е на ДПМ од 1991 година, на македонскиот ПЕН-Центар од 2009, на Сојузот на литературните преведувачи на Македонија, на меѓународното друштво „Калеваласеура“ во Хелсинки, Финска, и на Славјанската литературна и уметничка академија во Варна, Бугарија.

Досега објавила десетина поетски збирки, а добитничка е на значајните награди „Браќа Миладиновци“, „Григор Прличев“ и „Ацо Шопов“.

(Текстот е објавен во „Културен печат“ број 57, во печатеното издание на „Слободен печат“ на 21-22 ноември 2020)