Поранешниот обвинител на СЈО, сега дел од Основното јавно обвинителство Стевчо Донев и понатаму ќе постапува по предметот со кодно име „Триста“ кој се однесуваше на незаконската набавка на 300 возила за потребите на полицијата. Одлуката по овој предмет и понатаму да постапува Донев ја донел републичкиот обвинител Љубомир Јовески, дознава „Слободен печат“.

Од ОЈО само кусо потврдија дека на утрешното рочиште за „Триста“ ќе биде присутен обвинител од ОЈО, без да прецизираат за кој обвинител станува збор. Во „Триста“ обвинет е Ѓоко Поповски, поранешен помошник министер во МВР. Според пресудата која е укината од скопска Апелација и е вратена повторно во првостепена постапка, тој наводно незаконски спроведен тендер за набавка на возилата за МВР, а притоа бил оштетен државниот Буџет за 27 милиони денари.