Ако сте љубител на чоколадни деликатеси, а барате лесен и брз рецепт за колач што секојпат успева, тогаш сте на вистинското место.

Стефанија Несторовска, која стои зад инстаграм-профилот и блогот snestorovska.com, ви носи рецепт за чоко чискејк со свежи јагоди чија сезона наголемо започна.

Чискејк е прекрасен, лесен и вкусен колач, а домаќинките особено го сакаат бидејќи не мора да се пече.

Идеален е за секојдневието, но и за роденденски прослави или други посебни пригоди.
Стефанија и со овој рецепт покажа дека секогаш е во нова кулинарска авантура за осмислување на одлични деликатеси!

База:

– 150 г (1 филџан) јаткасти плодови (јас користев микс од ореви, лешници и бадеми, но слободно користете што ви одговара – може микс или само еден тип)
– 2 лажици какао во прав
– 175 г (1 филџан) урми
– 1 лажица кокосово масло (или повеќе)
– десетина јагоди, измиени и исечкани на мали парчиња

Фил:

– 210 г (1+1/2 филџан) индиски ореви, искиснати најмалку 2 часа или преку ноќ во вода
– 70 г (1/3 филџан) кокосово масло, стопено
– 100 г (1/3 филџан) агаве
– 10 г (1/3 филџан) какао
– 200 мл (помалку од 1 филџан) млеко од кокос во конзерва
– ситно сечкани ф’стаци или други јаткасти плодови за фил

Начин на подготовка:

Се подготвува калап. Јас користев силиконски каписли за мафини, меѓутоа може што било да послужи како калап. Може да користите керамичка или стаклена тава, плех за тарт, тава за мафини и слично…

Во сечко или блендер се додаваат јаткастите плодови и какаото и се блендира сè додека не се иситнат на мали парчиња. Се додаваат урмите (без семка) и кокосовото масло и се блендира сè додека не се соединат и не се добие леплива смеса што може да се оформува. Доколку е потребно, се додава и повеќе кокосово масло за да помогне во соединување на смесата.

Смесата во калапот се притиснува убаво и рамномерно. Ако користите калап за мафини – мене ми излегоа околу 10.

Се додаваат и исечканите јаготки веднаш врз базата без посебен распоред. Оставете во замрзнувач додека го подготвувате филот.

Искиснатите индиски ореви се премиваат со ладна, чиста вода и се процедуваат. Се додаваат во блендер со сите други состојки од филот и се блендираат сè додека не се добие соединета кремаста смеса.

Филот се распоредува врз базата и убаво се протресува калапот за да излезат сите меурчиња и да добиете рамна подлога.

Се остава во замрзнувач да се зацврсти најмалку 2 часа или идеално преку ноќ.

Се вадат од калапите или ако користите тава, се сечат и на крај се додаваат и исечканите ф’стаци и се притиснуваат за да се зацврстат.

Може да стојат во фрижидер до 7-8 дена, но за најубав резултат чувајте во замрзнувач (и до 1 месец) и само извадете ги 10-тина минути пред консумирање.

Забелешки и совети:

→ Агавето може да го замените со кој било друг течен засладувач.
→ Кокосовото млеко од конзерва може да го замените и со друго млеко по желба (растително или кравјо), со тоа што се додава малку повеќе од наведената количина. Вкусот нема да биде толку богат, но секако ќе бидат превкусни.