Бројот на банкроти во Шведска се зголеми во јануари на највисоко ниво во последната деценија поради зголемениот притисок врз градежните компании предизвикан од тековната криза на пазарот на недвижности, објави Блумберг.

Повикувајќи се на кредитната референтна агенција УЦ, американската агенција наведува дека бројот на стечајни пријави се искачил на 622, што претставува зголемување од 47 отсто во однос на претходната година. Шведска се бори со најлошиот пад на цените на куќите во последните три децении. Ситуацијата придонесе за зголемување на неплаќањата во градежниот сектор, при што 130 градежници поднесоа барање за стечај минатиот месец.

Цените на домовите, наводно, паднале за 16 отсто од својот врв во првиот квартал од минатата година, а економистите предвидуваат дека падот ќе продолжи, пренесува порталот Каматица.

„Во текот на есента видовме банкроти во бизнисите со кои се соочуваат потрошувачите, како што се малопродажбата, хотелите и рестораните. Сега гледаме дека најголем пораст се случува во секторите кои се тесно поврзани со индустријата и долгорочните инвестиции“, вели економистката Јохана Блом.

Остриот пад на шведскиот сектор на недвижности ја оштети најголемата економија во нордискиот регион. Според проценките на шведскиот национален одбор за домување, изградбата на нови домови драстично ќе се намали за 44 отсто оваа година.