Младите архитекти од меѓународната невладина организација „Културно Ехо“ започнаа иницијатива за пренамена на фабриката „Купром“ во скопската населба Хром, во студентски град односно културен, едукативен и креативен центар.

Претседателката на невладината организација, Симона Димковска, вели дека иницијативата пред половина година ја доставиле до Владата на Македонија, а моментално работат на тоа со анализа да потврдат дека нивната заложба е возможна, економски исплатлива и вистински бенефит не само за градот туку и за државата.

– Скопје како студентски град заслужува да има и неформално образование, кое ќе го надополнува високото образование.Тоа би бил студентски комплекс каде што би се работело на усовршувањето на образованието и значајно место во него би земале како домашни професори и студенти, така и од странство, вели Димковска.

Инаку, според нивното истражување, земјиштето на објектот е државно, додека неколку објекти се приватно сопствеништво. Симона потсетува дека напуштените фабрики насекаде во светот се пренаменуваат во објекти според потребите на граѓаните, но кај нас ваков пример досега не е забележан.

– Во моментов сме во соработка со општина Ѓорче Петров, каде што се наоѓа фабриката, и очекувам поддршка, овој капитален објект да го претвориме во објект од општествена корист за сите. Фабриките во сите европски земји обично се пренаменуваат за различни потреби на граѓаните, но тоа кај нас се уште не се случило. Ние немаме културно индустриско наследство, ова би било прв пример, објаснува Димковска и додава дека просторот дозволува, без да се направи некоја посебна надворешна промена на објектот од архитектонска гледна точка, без да се наруши екстериерот на објектот, внатре да се вметнат нови функционални единици, како посебни кубуси кои што се монтажни и каде може да се случат повеќе функции.

Од организацијата единствено стравуваат дека идејата може да остане без реализација, ако се одлучи објектот да се урне, и на негово место да се направат згради.