Деветмината ИТ експерти кои се осомничени за дигитална измама вредна околу 70 милиони долари во САД, денес се пуштени од екстрадиционен притвор во Србија.

Еден од нив е Кристијан Крстиќ (45) од Ниш, кој денес за првпат го виде и го прегрна својот осуммесечен син Крис. Уште од раѓањето на детето, тој беше зад решетки и не му беше дозволено да го види новородениот син.

САД обвинија вкупно 11 експерти за ИТ, од кои едниот е во САД, додека сопругата на Кристијан, Ксенија, исто така опфатена со обвинението, беше ослободена од притвор пред породувањето, но таа беше обврзана да носи дигитална алка на ногата.

На деветмина ослободени денес им истече законскиот притвор затоа што беа приведени на 23 јули минатата година.

Сопругата на Кристијан, Ксенија (44) за српски Курир изјави дека за нивната екстрадиција во САД треба да одлучи Судот за човекови права во Стразбур на 16 август.

Таа вели дека не треба да им се суди затоа што биле само посредници на платформите каде се нуделе „можности за инвестиции“.