Автобус кој превезувал деца од Србија вечерва излетал од автопатот „Тракија“ и се превртел во канал кај бугарскиот град Стара Загора, изјави за Нова.бг Станимир Станев, заменик главен секретар на бугарското МВР.

Несреќата се случила околу 20 часот и 10 минути, на 216-от километар од автопатот во правец на Софија. Според првичните информации, најмалку десет деца се тешко повредени.

Полицијата и пожарникарите се на терен. Сообраќајот на овој дел од автопатот е ограничен за да се обезбеди зелен коридор за транспорт на повредените деца до болниците.

На местото на настанот пристигнале пет полициски и пет екипи на противпожарната служба, како и Итната помош, а многу возачи застанале и помогнале да се извлечат повредените деца од автобусот. Меѓу повредените е и возачот. Децата од Србија се враќале од одмор на бугарското црноморско крајбрежје.

Засега нема информации за загинати, но меѓу пренесените во болница има тешко повредени, јавуваат локалните медиуми, повикувајќи се на полицијата.