Се родила предвреме, поминала повеќе од два месеци на оделението за интензивна нега на Клиниката за гинекологија, но сега слави прв роденден. Ваква е приказната на малата Марија Илиева од Радовиш, која била донесена на свет минатата година во 29 гестациска недела со тежина од 1.210 и должина од 36 сантиметри, што е речиси половина од она што треба да го има бебе родено во нормален термин.

Мајката Цветанка вели дека на клиниката ја добивала целосната поддршка и е презадоволна од вработените.

-Во болницата дојдов со болки, примав терапија, но сепак не можеше да се одложи породувањето. Презадоволна сум од сите на клиниката и затоа сакавме и тука да го прославиме првиот роденден, ова сепак и беше првиот дома на Марија – вели Цветанка.

Таа е мајка на уште две поголеми машки деца.

Марија иако предвреме родена е дете без застој, со уредни офталмолошки и невролошки прегледи. На својот прв роденден на одделението за интензивна нега таа влезе сама одејќи, на што може да и позавидат и децата кои се родени навреме.

Вработените на Гинекологија ја пречекаа Марија со насмевка и и посакаа  весели детски дни и многу остварени сни.