СРЕДНОШКОЛЦИТЕ НАЈАВИЈА БОЈКОТ: Нема настава доколку не им се исполнат барањата
Второто полугодие од оваа учебна година започнува во четврток, а од Сојузот на средношколците во земјава најавија бојкот на наставата се додека не бидат исполнети нивните барања.
Како дел од барањата на сојузот се намалување на бројот на предмети кои учениците треба да ги полагаа на државна матура, наместо четири да полагаат два, односно првиот предмет да биде задолжителен мајчин јазик, македонски, албански, турски, додека вториот предмет да биде по избор на ученикот. Дополнително, тука ја вбројуваат и проектната задача.
Истовремено, тие бараат МОН и Државниот испитен центар (ДИЦ) во март да објават и презентираат план и програма, за тоа како ќе изгледаат скратените наставни програми и другите материјали за испити.
„При составувањето на нашите барања за измена и поедноставување на содржината на државната матура, земавме пример од образовните власти во Франција (кои бројот на испити го намалија дури на еден – по избор на ученикот. Сепак, поради важноста на Уставот и мајчините јазици, сметаме дека и мајчиниот јазик треба да остане задолжителен испит)“, стои во соопштението на Сојузот.
Барањата, како што посочуваат од сојузот, биле предложени и до образовните институции од страна на Сојузот, за време на состанокот со министерката Мила Царовска на 9 декември минатата година.