Средба на Заев со амбасадорката Галовеј: НАТО членството нека биде охрабрување за британските инвеститори да инвестираат во С. Македонија
Премиерот Зоран Заев се сретна со амбасадорка на Обединетото Кралство во нашата држава, Рејчел Галовеј. На средбата е изразено очекување за уште поактивно унапредување на соработката во сите области, по потпишаната спогодба за партнерство, трговија и соработка меѓу Република Северна Македонија и Обединетото Кралство на Велика Британија и Северна Ирска.
Со тоа, како што е оценето, се создадени можности за проширување на билатералните односи во сите области. Како пример за добрата соработка е посочено и меѓусебното признавање на возачките дозволи за што во фаза на заокружување се формалните процедури.
На средбата била соопштена и заедничка определба за зголемување на економската соработка, иако Обединетото Кралство и денес е еден од најголемите странски директни инвеститори во земјава.
– Фокусирано работиме на економскиот развој затоа што ни е важен економскиот стандард на граѓаните. Во таа насока веруваме дека НАТО членството е охрабрување и за инвеститорите и од Обединетото Кралство и од другите земји членки, да инвестираат тука. Во тек се и реформите во правосудството, со коишто очекуваме ефикасност и транспаретност во областа, што е важно за европските перспективи на државата, но и за граѓаните и инвеститорите, рекол премиерот Заев, стои во соопштението.
Премиерот Заев и амбасадорката Галовеј разговарале и за помош и споделување искуства од Велика Британија во областа на безбедноста, на владеење на правото, на образованието и на медиумите.
Премиерот Заев се заблагодарил на амбасадорката Галовеј за поддршката на кандидатурата на нашата држава за претседавање со ОБСЕ во 2023 година, како и за успешната соработка во областа на одбраната.