Средба Бочварски – Силвестри: Капиталните проекти се важни за економскиот развој
Инфраструктурните проекти што се реализираат во делот на патната и на железничката инфраструктура, како и проектот за гасификација на земјата, беа главни теми на разговор на денешната работна средба на министерот за транспорт и врски Благој Бочварски со aмбасадорот на Италија во Скопје, Андреа Силвестри.
– Амбасадорот се запозна со крупните капитални проекти што ги реализираме во нашата држава. Разговаравме за сите, посебно за проектите што планираме да ги реализираме во наредниот период, а кои се значајни за регионалното поврзување на земјата. Ова беше одлична можност да разговараме и за зголемување на економската соработка, изјави Бочварски.
Како што соопшти Министерството за транспорт и врски, Бочварски и Силвестри на средбата разменија и мислења и искуства на двете земји во однос на справување со предизвиците од ковид-кризата.
Министерот Бочварски изрази благодарност за досегашната соработка и ја потенцира потребата од зголемување на економската соработка меѓу двете земји.