Србија може да започне со производство на руската вакцина за шест месеци: Би имале доволно вакцини за нас и за целиот регион
Србија наскоро би можела да започне со производство на руската вакцина „Спутник V“, а како што најави српскиот министер за здравство, Златибор Лончар, за тоа ќе се знае повеќе до крајот на неделата, бидејќи тим на руски експерти најави посета на Институтот „Торлак“ во четврток.
Како што изјави Лончар, тоа би значело дека Србија би можела да произведува вакцини и за своите, но и за потребите на регионот, а процесот на првата фаза би можел да започне веќе за два до три месеци.
– Под прва фаза подразбирам дека ќе дојдат поголем дел од готовите супстанци тука, а потоа ние ќе изработиме еден мал дел, ќе го спакуваме, спремиме за употреба, обележиме и ќе ги направиме сите неопходни контроли, рече Лончар.
Како што рече тој утринава, после првата фаза, за шест-седум месеци, во „Торлак“ би можела да започне и самото производство на вакцини против коронавирус.
– Тоа би значело дека би имале доволно вакцини и за нас и за целиот регион, рекол Лончар откако утринава ја примил втората доза на вакцината.