Çmimi botëror i arit u rrit në 3.000 dollarë për ons (28,34 gram) sot për shkak të pasigurisë së tregtisë globale dhe pritjeve se normat e interesit në Shtetet e Bashkuara do të ulen. përcjellë BBC.

Çmimi i metalit të çmuar u rrit 0,4 për qind në 3.000,20 dollarë për ons. Që nga fillimi i vitit, vlera e arit është rritur me mbi 14 për qind. Ari është konsideruar prej shekujsh një strehë e sigurt për kapitalin në kohë të trazuara, ndaj rritja e kërkesës për të është tregues i nivelit të frikës dhe pasigurisë në tregje.

Në 25 vitet e fundit, çmimi i arit është rritur dhjetëfish, që është një normë rritjeje më e shpejtë se indeksi amerikan S&P 500, i cili u rrit katërfish në të njëjtën periudhë. Rritja e çmimit të arit zakonisht shoqërohet me trazira ekonomike dhe politike.

Çmimi i arit për herë të parë kaloi kufirin e 1.000 dollarëve për ons gjatë Krizës së Madhe Financiare në vitin 2008 dhe u rrit mbi 2.000 dollarë gjatë pandemisë së koronavirusit.

Çmimet ranë në 1.600 dollarë pas pandemisë, por filluan të rriten sërish në vitin 2023, të nxitura nga blerjet e mëdha nga bankat qendrore.