Lufta në Ukrainë filloi me Krimenë dhe duhet të përfundojë me çlirimin e saj, tha presidenti Volodimir Zelenski, transmeton BBC.

Presidenti ukrainas foli pasi një seri shpërthimesh goditën një bazë ajrore ruse në gadishull dje, duke vrarë një person.

Zelensky nuk i përmendi shpërthimet, por tha: "Krimeja është ukrainase dhe ne kurrë nuk do të heqim dorë nga ajo".

Ministria ruse e Mbrojtjes njoftoi se bëhej fjalë për një shpërthim municioni në bazë. Ndërkohë, Ukraina ka mohuar përgjegjësinë për shpërthimet.

Në një zhvillim të veçantë, autoritetet ukrainase thanë se 11 persona u vranë në sulmet ruse gjatë natës në rajonin qendror të Dnipropetrovsk dhe një tjetër në rajonin Zaporozhye në jug.

Krimea njihet ndërkombëtarisht si pjesë e Ukrainës – por gadishulli i Detit të Zi u aneksua nga Rusia në vitin 2014 pas një referendumi të konsideruar të paligjshëm nga komuniteti global. Shumë ukrainas e shohin këtë si fillimin e luftës së tyre me Rusinë.