Presidenti ukrainas Volodymyr Zelensky tha sot se është i hapur ndaj mundësisë së vendosjes së ushtrive perëndimore në Ukrainë, në mënyrë që të garantojë sigurinë e vendit dhe t'i japë fund luftës pothuajse trevjeçare me Rusinë.

Në një postim në “Telegram”, Zelensky shkroi se vendosja e trupave të huaja do të ishte një hap në rrugën drejt anëtarësimit të Ukrainës në NATO. Ai shtoi se paraprakisht është e nevojshme të përcaktohet qartë se kur Ukraina do të bëhet anëtare e BE-së dhe NATO-s.

Përpjekjet diplomatike për t'i dhënë fund konfliktit më të madh të Evropës që nga Lufta e Dytë Botërore përballen me sfida komplekse, veçanërisht për shkak të avantazhit ushtarak të Rusisë në terren. Zelensky vuri në dukje se së shpejti do të bisedojë me presidentin amerikan Joe Biden për këtë çështje, pasi mandati i tij është ende në vazhdim.

Pranimi i Ukrainës në NATO ka qenë i diskutueshëm që kur Rusia nisi një pushtim në shkurt 2022. Në samitin e Uashingtonit këtë vit, u konfirmua se Ukraina është "në rrugën pa kthim" të anëtarësimit, por pa një ftesë specifike për negociata.