Zelenska para deputetëve britanikë: Vajza më e vogël e përdhunuar nga pushtuesit rusë ishte katër vjeçe, na duhet drejtësi

Olena Zelenska
Zonja e Parë e Ukrainës, Olena Zelenska / Foto: EPA-EFE/SAUL LOEB / POOL

“Çdo ditë dëgjojmë sirena. Ato janë identike me ato të dëgjuara nga brezat britanikë në Luftën e Dytë Botërore. Ju nuk u dorëzuat dhe ne nuk do të dorëzohemi. Por fitorja nuk është e vetmja gjë që na nevojitet. Ne kemi nevojë për drejtësi. Unë vij tek ju për drejtësi”, tha sot zonja e parë ukrainase Olena Zelenska nga foltorja e Parlamentit Britanik.

Gjatë fjalimit të saj në Westminster, Zelenska i bëri thirrje komunitetit botëror të bashkohet dhe të mbështesë krijimin e një gjykate speciale ku rusët do të mbajnë përgjegjësi për krimet e kryera gjatë pushtimit të Ukrainës.

– Po ju kërkoj një favor të vogël: të bëhemi lider botëror në përpjekjet për drejtësi, tha ajo.

“Rusët, me sulme masive me raketa dhe dron, po përpiqen t'i kthejnë ditët dhe netët e Ukrainës në terror”, tha Zelenska. Ajo shtoi se më shumë se 20 milionë ukrainas kanë mbetur pa energji elektrike, ujë dhe ngrohje për shkak të sulmeve me raketa ruse dhe se Rusia "përdor dhunën sistematike në shumë qytete dhe fshatra të okupuara në Ukrainë".

Ajo tha se mijëra krime të kryera nga forcat ruse, përfshirë dhunën seksuale, ishin identifikuar.

- Vajza më e vogël që u përdhunua nga pushtuesit rusë ishte katër vjeç. I mbijetuari më i vjetër ishte 85 vjeç. Këto janë viktimat, tha Olena Zelenska, duke kërkuar drejtësi për ta.

“Drejtësia nuk është e nevojshme vetëm për Ukrainën, por edhe për të gjithë botën, që të mos sundojë me forcë”. Ne kemi nevojë për drejtësi që bota të mbijetojë”, përfundoi fjalimin e saj bashkëshortja e presidentit ukrainas. Në fund të fjalës së saj ajo mori duartrokitje nga deputetët e pranishëm.

Zonja e Parë e Ukrainës i bëri thirrje publikut britanik gjatë festave të fundvitit për të mos harruar “tragjedinë” e shkaktuar nga pushtimi rus.

Ajo tha se ukrainasit "ndiejnë mbështetjen e fortë" si dhe ndihmën politike, financiare dhe humanitare që marrin nga britanikët.

Zelenska nga Londra: Mos harroni tragjedinë e Ukrainës gjatë pushimeve

Video e ditës