Situata me shembjen e digës Kakhovka duhet të jetë objekt studimi dhe hetimi në mbarë botën, tha zëdhënësja e Ministrisë së Jashtme ruse, Maria Zakharova.

“Kjo nuk është më temë e ditës apo e javës, por është vendosur në një kontekst historik. Po flas për atë që ndodhi dje me Kakhovkën. Vërtet duhet të bëhet temë për studim dhe hulumtim në mbarë botën”, theksoi Zakharova.

Ajo vuri në dukje se reagimi i Perëndimit në të gjitha situatat e tilla është "plotësisht i parashikueshëm", duke theksuar se ekziston një dëshirë e pafundme për të fajësuar Rusinë për gjithçka që ndodh, pavarësisht nëse ka ndodhur vërtet apo është një pjellë imagjinate.

Zakharova sqaroi se e gjithë kjo është pjesë e "luftës informative dhe psikologjike dhe lidhjes së pafund të të gjitha gjërave negative që po ndodhin brenda, jashtë dhe në periferi të vendeve perëndimore me Rusinë, për të mbajtur qëndrimin histerik të banorëve të tyre në lidhje me situata në Federatën Ruse”, raportoi TAS.