Analiza e fundit e ndikimit të cilësisë së ajrit në shëndetin e njeriut nga Agjencia Evropiane e Mjedisit (EEA) thotë se të paktën 239.000 vdekje mund t'i atribuohen ekspozimit ndaj grimcave të imta në ajër, raporton euronews.
Siç thekson EEA, bazuar në shifrat për vitin 2022, 70.000 vdekje i atribuohen ndotjes së ozonit dhe 48.000 ndotjes nga dioksidi i azotit.

Të dhënat e fundit konfirmojnë edhe një herë se evropianët janë të ekspozuar ndaj përqendrimeve të ndotësve të ajrit dukshëm mbi nivelet e rekomanduara të Organizatës Botërore të Shëndetësisë (OBSH), tha EEA në një deklaratë.

– Edhe pse janë vendosur rregulla më të rrepta të BE-së për cilësinë e ajrit, shumë njerëz në të gjithë Evropën, veçanërisht ata në qytete, janë ende të ndikuar negativisht nga cilësia e dobët e ajrit që rezulton në sëmundje dhe vdekje të parakohshme që janë kryesisht të parandalueshme përmes reduktimit të niveleve të këtyre ndotësve në mjedisin, tha drejtoresha e EEA Leena Ila-Mononen.

Raporti i EEA gjithashtu thekson se midis 2005 dhe 2022, numri i vdekjeve në BE që i atribuohen grimcave të imta është ulur me 45 për qind.

Publikimi i të dhënave për ndikimin e cilësisë së ajrit në shëndetin e njerëzve përkoi me zbatimin e direktivës së re të BE-së për respektimin e standardeve të OBSH-së.