Eurodeputetët miratuan sot një projekt-ligj për rritjen e prodhimit të municioneve në Bashkimin Evropian në mënyrë që të rivendosen rezervat dhe të përshpejtohen dërgesat në Ukrainë. Ligji "Mbështetja e prodhimit të municioneve" u miratua me 446 vota pro, 67 kundër dhe 112 abstenime, në një seancë mini-plenare në Bruksel.

Në fillim të majit, Komisioni Evropian zbuloi atë plan, i cili përfshin 500 milionë euro për të rritur kapacitetin e prodhimit të municioneve të BE-së në një milion raketa në vit. Ai duhet të mundësojë bashkëfinancimin e investimeve të industrialistëve për të rritur prodhimin e fabrikave të tyre në BE.

Sipas komisionerit të industrisë Thierry Breton, së bashku me financimin e vendeve anëtare, kapaciteti investues do të ishte një miliard euro.

Eurodeputetët që vendosën të zbatojnë procedurën urgjente për miratimin e atij ligji, tani duhet të fillojnë negociatat me Këshillin e BE-së (vendet anëtare) për të arritur një marrëveshje, dhe të shkojnë në miratimin përfundimtar në një seancë plenare në korrik.