BDI edhe një herë tentoi të mashtrojë shqiptarët, por propaganda e tyre u shkatërrua me fakte! Akuzat e tyre të pabaza për urimin e Kosovës për pavarësinë e saj janë hedhur poshtë nga zyra e presidentit të vendit, e cila ka konfirmuar se urimi është dërguar më 16 shkurt. “Urime i kanë dhënë edhe zëvendëskryeministrat e VREDI-t, Izet Medziti dhe Arben Fetai, të cilët edhe një herë dëshmuan përkushtimin e tyre institucional ndaj Kosovës”, njoftoi sot koalicioni VREDI.

Ata thonë se “Ky veprim i BDI-së nuk është as i pari dhe as i fundit në strategjinë e tyre të njohur të përdorimit të dezinformatave si mjet politik”. “Partia që uzurpoi pushtetin për dy dekada në dëm të qytetarëve shqiptarë dhe të gjithë qytetarëve të Maqedonisë së Veriut, tani po përpiqet të krijojë konflikte të kota dhe të shkëpusë vëmendjen e publikut nga dështimet e saj spektakolare në të gjitha fushat.

BDI ka dëshmuar se nuk ka kulturë politike dhe nuk mund të ofrojë vizion për të ardhmen e vendit. Çdo ditë gënjeshtrat dhe manipulimet e tyre ekspozohen para qytetarëve, duke treguar fytyrën e vërtetë të kësaj partie të rraskapitur. VREDI u bën thirrje qytetarëve që të mos bien pre e propagandës së një partie që ka humbur çdo besueshmëri. “Është koha për qeverisje të ndershme dhe të përgjegjshme, larg mashtrimeve dhe skenarëve të sajuar për interesa të ngushta politike”, thotë Vredi.