Ukraina duhet të kujtojë se merr ndihmë nga Polonia, tha presidenti polak Andrzej Duda, mes thellimit të mosmarrëveshjes midis vendeve për importin e produkteve bujqësore. Reuters.

Ndërsa Polonia mbetet një mbështetëse e vendosur e Ukrainës përballë pushtimit rus, të dy vendet janë në mosmarrëveshje rreth zgjatjes së fundit nga Polonia të një ndalimi mbi importet e drithit ukrainas, që Varshava thotë se është e nevojshme për të mbrojtur fermerët e saj.

“Do të ishte mirë që Ukraina të kujtonte se merr ndihmë nga ne dhe të kujtonte se ne jemi gjithashtu një vend tranzit drejt Ukrainës”, u tha Andrzej Duda gazetarëve në Nju Jork pas fjalimit në Asamblenë e Përgjithshme të Kombeve të Bashkuara.

Polonia, Sllovakia dhe Hungaria njoftuan kufizime në importet nga Ukraina të premten pasi Komisioni Evropian vendosi të mos zgjasë ndalimin e shitjeve për pesë fqinjët e Ukrainës në BE, përfshirë Rumaninë dhe Bullgarinë. Ndalimi u vendos pasi vendet panë një përmbytje të importeve të lira nga Ukraina, teksa ajo përpiqej të dërgonte grurë në vendet më larg.

Ndërsa Ukraina bëri thirrje për "dialog konstruktiv" të martën, një zëdhënës i Organizatës Botërore të Tregtisë konfirmoi se Kievi kishte ndërmarrë hapin e parë në mosmarrëveshjen tregtare duke paraqitur një ankesë pranë organit global të tregtisë.

Duda tha se nëse Ukraina paraqet ankesën, Polonia do të shpjegojë situatën në gjykatë.

Ai nënvizoi se ndalimi vlen për importin, por jo për tranzitin e grurit ukrainas.

"Ka qarqe biznesi që kanë interesa në Ukrainë dhe dëshirojnë të shesin drithë sa më shpejt të jetë e mundur me çmimin më të ulët të mundshëm. Ne duhet të mbrohemi kundër kësaj”, tha ai.