Autoritetet ukrainase njoftuan sot se në 24 orët e fundit, nëntë persona humbën jetën në zjarret në përpjekje për të ngrohur shtëpitë e tyre.

Në njoftimin zyrtar thuhet se numri i zjarreve është në rritje sepse, për shkak të ndërprerjeve të rregullta të furnizimit me energji elektrike, ukrainasit gjithnjë e më shumë po përdorin gjeneratorë, qirinj dhe bombola gazi në shtëpitë e tyre, raportojnë mediat britanike.

“Vetëm në 24 orët e fundit në Ukrainë janë regjistruar 131 zjarre, nga të cilat 106 në ndërtesa banimi. Nëntë persona humbën jetën dhe tetë u plagosën. “Zjarret janë bërë më të shpeshta për shkak të shkeljeve të rregullave të sigurisë nga zjarri në ndërtesat e banimit dhe përdorimit të pajisjeve të pacertifikuara për ngrohjen dhe përgatitjen e ushqimit”, thanë autoritetet ukrainase në një deklaratë.

Autoritetet apelojnë qytetarët që të jenë më të kujdesshëm në shtëpitë e tyre dhe t'u shpjegojnë fëmijëve rreziqet e zjarrit.