Rritja e çmimeve, veçanërisht e ushqimeve dhe karburanteve, në Shqipëri ka vijuar edhe në muajin korrik, gjë që shkaktoi rritje të mëtejshme të inflacionit.

- Në korrik, inflacioni arriti në nivelin 7,5 për qind, që është norma më e lartë në dy dekadat e fundit, pra pas vitit 2002, kur ishte 7,6 për qind. Në muajin korrik të vitit të kaluar u shënua inflacion prej 2,2 për qind.

Sipas Institutit të Statistikave, INSTAT, rritje është vërejtur në të gjitha produktet dhe shërbimet.

Në rastin e transportit dhe produkteve ushqimore, çmimet janë dyfish më të larta. Këto dy grupe janë ato për të cilat qytetarët shqiptarë shpenzojnë pjesën më të madhe të buxhetit të tyre familjar. Në grupin e ushqimeve çmimet më të larta janë qumështi dhe produktet e qumështit, drithërat dhe produktet e tyre, si dhe perimet dhe frutat.

Inflacioni i korrikut është mbi dy herë më i lartë se parashikimi i Bankës Qendrore të Shqipërisë prej tre për qind.

Muajin e kaluar niveli i inflacionit ishte 7,4 për qind, në maj 6,7, në prill arriti normën 6,2 për qind, në mars ishte 5,7 për qind, ndërsa në shkurt 3,9 për qind.

Për të zbutur presionet në rritje të çmimeve, nëpërmjet politikës monetare, Banka Qendrore e Shqipërisë, në fillim të këtij muaji, rriti sërish normën bazë të interesit, këtë herë me 0,5 për qind dhe tashmë ajo qëndron në 1,75 për qind, që është rritja e katërt. kete vit.