Të paktën gjashtë persona u shtruan në spital, tre prej tyre me plagë me armë zjarri, pasi forcat izraelite hapën zjarr ndaj të rinjve palestinezë të cilët hodhën gurë ndaj tyre gjatë një operacioni izraelit në qytetin palestinez Ramallah në Bregun Perëndimor të pushtuar.

Një dëshmitar tha për mediat britanike se një autokolonë e madhe ushtarake izraelite mbërriti në qendër të Ramallah, selia e Autoritetit Palestinez, herët këtë mëngjes, duke bërë që qindra palestinezë të mblidheshin në zonë.

Forcat izraelite, që thuhet se janë në një operacion për të prishur një shtëpi në Ramallah, qëlluan me municion të vërtetë, granata trullosëse dhe gaz lotsjellës në një turmë të rinjsh palestinezë që po gjuanin me gurë ndaj tyre, tha një dëshmitar, ndërsa videot e postuara në mediat sociale thuhet se treguan si u hodhën kokteje molotov ndaj forcave izraelite.

Ministria palestineze e Shëndetësisë tha se të paktën gjashtë persona u dërguan në spital, tre prej të cilëve pësuan plagë me armë zjarri.