Parlamenti i Iranit votoi sot për rritjen e dënimeve për gratë që refuzojnë të mbulojnë flokët me shami - "hixhab" dhe për ato që i mbështesin për ta bërë këtë.

Ndryshimet në ligj u miratuan disa ditë pas përvjetorit të vdekjes së 22-vjeçares Masha Amini, e cila u arrestua nga policia e moralit pasi kishte treguar flokët e saj nën shami, në kundërshtim me ligjin e rreptë islamik për veshjen e grave. Vdekja e saj në paraburgim shkaktoi protesta muajsh në Iran dhe në mbarë botën.

Gjatë demonstratave për vdekjen e Masha Amini, më shumë se 500 protestues u vranë dhe 22.000 u arrestuan.

Ligji u ndryshua sot me 70 dispozita dhe tani gjoba vlejnë edhe për pronarët e dyqaneve nëse u shërbejnë grave që nuk mbajnë shami dhe organizatorëve të protestave kundër mbajtjes së “hixhabit”.

Shkelësit përballen me 10 vjet burg nëse organizojnë shkelje të hixhabit.

Në Kuvendin me 290 vende parlamentare, 152 deputetë votuan për ndryshime në ligj, dhe rregullorja duhet të miratohet nga Këshilli i Gardianëve - një organ i shenjtë për mbikëqyrjen kushtetuese. Nëse ai hyn në fuqi, ligji do të zbatohet për një periudhë paraprake prej tre vjetësh.

Megjithatë, gratë në mënyrë sfiduese shmangin veshjen e hixhabit, kështu që një fushatë kundër këtij ligji filloi në verë.

Udhëheqësit klerikë të Iranit e shohin kodin e veshjes si një shtyllë kryesore të sundimit të tyre dhe fajësojnë vendet perëndimore për demonstratat që kanë tronditur thellë Republikën Islamike.

Protestuesit pretendojnë se ishin të motivuar jo vetëm nga zemërimi për kodin e veshjes, por edhe nga korrupsioni dhe keqmenaxhimi i vendit.