Policia australiane nisi sot një hetim pasi një veture dhe pronë e mbuluar me grafite anti-izraelite iu dogjën në Sidnei, vetëm disa ditë pasi një sulm me zjarr në një sinagogë në Melburn po hetohet si një "sulm terrorist", raporton BBC.

Kryeministri Anthony Albanese e dënoi incidentin si një krim urrejtjeje. “Nuk ka vend për antisemitizëm në këtë vend apo askund tjetër”, tha ai për ABC News.

Incidenti vjen disa ditë pasi një zjarr shpërtheu në një sinagogë në Melburn, duke lënë një burrë me lëndime të lehta, në atë që policia atje po e trajton si një sulm të mundshëm terrorist.

Autoritetet në Sidnej thanë se po kërkonin dy persona të moshës 15 deri në 20 vjeç në lidhje me vandalizmin.

Dyshja kishin veshur mbulesa për fytyrën dhe veshje të errëta dhe u panë duke ikur nga vendi i ngjarjes, tha policia e NSW.

"Ne kemi nevojë për ndihmën e publikut për të identifikuar këta dy individë," u tha gazetarëve zëdhënësja e policisë Karen Webb.

Policia tha se zjarri i makinës u shua menjëherë pasi zjarrfikësit u thirrën në vendngjarje në Woollahra, një periferi në lindje të Sidneit.

Në vendngjarje u zbuluan mesazhe anti-izraelite të skalitura në gardhin e dy pronave dhe në një makinë.

Në fillim të kësaj jave, një grup i posaçëm i policisë u krijua për të hetuar incidentet që lidhen me antisemitizmin, duke përfshirë një sulm të dyshuar terrorist në Melburn dhe një sulm tjetër vandal në Woollahra muajin e kaluar. Policia nuk beson se dy incidentet në Woollahra janë të lidhura.

Kryeministri i NSW Chris Minns tha se incidenti i fundit dukej se ishte "i projektuar në mënyrë specifike" për të frikësuar komunitetin hebre të Sidneit.

Presidenti i Bordit të Deputetëve të Hebrenjve të Uellsit të Ri Jugor, David Ossip tha se komuniteti i tij ishte "i pikëlluar" nga ajo që kishte ndodhur, por nuk do të frikësohej.