Qeveria e Kosovës ka ndarë 305.710 euro për të mbështetur gazetarët ukrainas dhe afganë që qëndrojnë në Kosovë. Kërkesa për ndarjen e këtyre mjeteve buxhetore është dërguar nga Ministria e Punëve të Jashtme dhe Diasporës.

Ministri i Financave Hekuran Murati tha se fondet do të merren nga kategoria e emergjencës.

“Kemi ndarë mbi 305 mijë e 710 euro për të mbështetur gazetarët ukrainas dhe afganë që janë të përkujdesur në Kosovë.
Mjetet janë marrë nga kategoria e emergjencës dhe transferohen në Ministrinë e Brendshme të Kosovës. Ky është vendimi që lejon qëndrimin e gazetarëve ukrainas dhe afganë të mbulohet edhe për këtë vit”, tha Murati.

Disa gazetarë ukrainas të cilët u detyruan të largohen nga vendi i tyre pas pushtimit rus tani jetojnë në Prishtinë në kuadër të programit "Gazetarët në Rezidencën e Kosovës".

Ky program financohet nga Qeveria e Republikës së Kosovës dhe mbulon shpenzimet e jetesës, pagës dhe zyrës deri në gjashtë muaj për t'u mundësuar gazetarëve ukrainas të punojnë nga distanca.

Ndërkohë, në dhjetor të vitit 2022, Qeveria e Kosovës miratoi buxhetin prej 30.000 mijë eurosh për akomodimin e gazetarëve afganë. Autoriteti ekzekutiv njoftoi se Kosova do të presë pesë gazetarë nga Afganistani dhe ata do të mund të qëndrojnë në vend për dy vjet.