Një betejë e ashpër është duke u zhvilluar në qytetin Ugledar në Ukrainën lindore, të cilin forcat ruse po përpiqen ta kapin, thanë sot zyrtarët rusë dhe ukrainas, dhe Kievi thotë se Moska po "e ekzagjeron" suksesin e ofensivës së saj.

Kreu i administratës pushtuese ruse në rajonin ukrainas të Donetskut, Denis Pushlin theksoi se "ai pret lajme të mira nga Ugledar, një qytet minierash që kishte rreth 15.000 banorë para pushtimit rus".

"Rrethimi dhe çlirimi i qytetit në të ardhmen do të zgjidhë disa gjëra," tha Pushlin, duke thënë se fitorja do të lejojë një ndryshim në ekuilibrin e forcave në front dhe do të hapë rrugën për një ofensivë ndaj qyteteve Pokrovsk dhe Kurakhove, të cilat janë në veri.

Një nga këshilltarët e tij, Ian Gajin tha se "luftimet e rënda dhe brutale" ishin duke u zhvilluar dhe se forcat ruse kishin zënë pozicione në pjesët juglindore dhe lindore të Ugledar.

Zëdhënësi i ushtrisë ukrainase për zonën lindore, Sergiy Cherevati konfirmoi se po ndodhte një "luftë e ashpër", por siguroi se rusët ishin shtypur.

“Armiku po përpiqet të ketë sukses në atë sektor, por nuk po ia del mbanë falë përpjekjeve të mbrojtjes së Ukrainës”, tha Cherevati.

Zyrtarët ukrainas thanë këtë javë se ushtria ruse në numër më të madh po intensifikon sulmet në lindje, veçanërisht rreth Ugledar dhe Bakhmut. Bakhmut ka qenë një objektiv i Rusisë prej muajsh, pavarësisht humbjeve të mëdha të forcave të saj.

Forcat ruse dhe trupat e grupit privat paraushtarak "Wagner" së fundmi pushtuan Soledar, një qytet në veri të Bakhmutit.