Edhe sonte ka protesta masive në Turqi. Erdogan bëri një deklaratë gjithashtu “Turqia nuk do t'i dorëzohet terrorit në rrugë”, tha Erdogan, duke vlerësuar se protestat e thirrura nga opozita do të përfundonin në rrugë pa krye.

“Ne nuk do të tolerojmë asnjë shqetësim të rendit dhe qetësisë publike”, shtoi ai.

Ndryshe, Ozgur Ozel, lideri i Partisë Popullore Republikane (CHP), partia më e madhe opozitare në vend, së cilës i përket Imamoglu, u ka bërë thirrje turqve që të dalin sot në orën 20:30, përkundër kërcënimeve nga qeveria.

Mbrëmë në Stamboll, Ankara dhe qytete të tjera turke janë mbajtur tubime proteste ku janë përfshirë mijëra qytetarë. Në total, që nga e mërkura, ditën e arrestimit, protesta janë zhvilluar në 29 nga 81 provincat e Turqisë.

Të martën, autoritetet vendosën një ndalim katër-ditor të tubimeve, por kjo nuk i ndaloi qytetarët të mblidheshin në numër të madh të enjten përpara bashkisë dhe komisariateve të policisë, si dhe në universitete dhe sheshet në të gjithë Turqinë.

Incidente më të vogla ndodhën në orët e vona të pasdites para bashkisë së Stambollit, ku studentë dhe qytetarë nga çdo cep i qytetit u mblodhën, ndërsa policia përdori gaz lotsjellës dhe plumba gome.