Një imazh i planetit Mars u transmetua drejtpërdrejt të premten, për herë të parë, nga Agjencia Evropiane e Hapësirës (ESA) falë satelitit Mars Express.

Aktiviteti u mbajt me rastin e 20-vjetorit të pajisjes hapësinore që harton sipërfaqen e “Planetit të Kuq” në tre dimensione. Fillimisht u vlerësua se do të funksiononte për vetëm dy vjet.

ESA lëshon një imazh çdo 50 sekonda.

Pamjet vizuale u bënë të disponueshme në llogarinë e ESA-s në Twitter dhe hashtagun #MarsLIVE.

Zakonisht imazhet nga pajisjet në orbitë rreth Marsit ose në sipërfaqen e tij ruhen dhe dërgohen në një "paketë" në Tokë në intervale të rregullta.

Për shkak të distancës nga Toka në Mars, imazhit i duhen 13-22 minuta për të arritur në Tokë, në varësi të vendit ku ndodhen dy planetët në orbitat e tyre rreth Diellit. Pamjet e Mars Express zgjatën 17 minuta.